Ġnien Zaylen

Ġnien Zaylen huwa spazju miftuħ ta’ madwar 5,500 metru kwadru biswit iċ-Ċentru tas-Servizzi ta’ Matul il-Jum tal-Aġenzija Sapport f’Raħal Ġdid. Dan il-ġnien huwa imsemmi b’tifkira ta’ tifel li tilef ħajtu traġikament li issa ġiet trasformat fi spazju aħdar, inklużiv u terapewtiku. Bħala parti mill-implimentazzjoni tal-Istrateġija Nazzjonali tal-Awtiżmu ta’ Malta 2021 – 2030, hekk kif dan il-ġnien qed jippromovi l-inklużjoni, aktar għarfien ambjentali u interazzjoni soċjali. L-ispazju ġie mgħammar ukoll b’tagħmir interattiv għal-logħob biex jippromwovi logħob attiv u żvilupp sensorjali għal min jagħmel użu
minnhom. F’dan il-ġnien saru wkoll kaxxi mgħollija kif ukoll bankijiet biex it-tħawwil ikun aktar aċċessibbli u jsir b’mod iktar faċli. Saru wkoll żoni kwieti biex wieħed ikun jista’ jirrilassa, u passaġġi sensorjali, pjanti aromatiċi u elementi oħra li joffru esperjenza aktar terapewtika. Fost il-faċilitajiet rikreattivi hemm pitch tal-boċċi, li jgħin fl-iżvilupp ta’ ħiliet u sport inklużiv. Ġie mtejjeb ukoll il-kamp tal-basketball eżistenti biex jinkoraġġixxi l-użu bejn l-utenti tas-servizz u l-komunità, u b’hekk jippromwovi interazzjoni soċjali aktar b’saħħitha.